【二O十九求職百科】④老闆唔走,你都咪使旨意走!?

話咁快就過咗個新年,相信拎長假去旅行嘅大家都差不多要歸位,筆者諗返起上星期嘅「戰況」,分分鐘仲攰過平時返工。

話說筆者素來甚少出門拜年,因為好多時候都係親戚們登堂入室。換言之,上星期每日都會有三五成群上門敘舊。問題就嚟啦,就傳統禮教而言,有客到就要招呼到佢地走為止。親戚山長水遠嚟拜年,可能大家一年先見得嗰一次,同啲叔伯兄弟表姐妹傾偈update吓近況都人之常情,自然唔能夠客人未走就自己走鬼咗去。

但如果換轉係大家每日返工都要面對嘅老闆,咁你哋又頂唔頂得順呢?

個個都OT,唔通個個都想OT?

筆者有個朋友當年初出茅廬,正所謂「細路仔唔識世界」,初初返工第一個星期每日都準時離開office,原因只得一個:公司未有嘢畀佢做,而佢又已經睇哂所有要睇嘅文件,就連員工守則都唔放過。

但結果去到第二個星期,佢阿姐忽然間就捉咗佢入房「傾偈」:

😊:呀…David呀,返咗一個禮拜啦喎,慣唔慣呀?
👦🏽:幾好呀,但暫時未有咩做,每日都係睇你畀我嘅rules同protocols。
🙃:咁我都明白嘅,遲吓會忙啲㗎啦。另外呢,即係咁呀,好多時唔係話你唔肯OT,而係好多時你準時拍拍「籮柚」走咗去呢,對條team嘅士氣都有影響,你明唔明呀?
🐶:好,明白,唔好意思呀真係,我以後會畀啲心機㗎啦!

以上嘅對白就算唔係十足十都有九成一樣,筆者當年聽完朋友複述之後,真係頭都大埋,但佢自從同阿姐開完個「心事台」之後,就冇再試過準時收工,即使冇嘢做都好,都要等到阿姐離開咗office先證明到佢有幾「teamwork-oriented」。

/等/寂寞到夜深/

偏偏佢阿姐係嗰種好鍾意留喺office等老公嘅人,過咗辦公時間嘅佢,就會喺位埋首Whatsapp,默默地等佢另一半之餘,又同啲細嘅傾吓「今晚食乜餸」,可以話係teamwork嘅極致。

真係有嘢做嘅話都算啦,今日OT咪當聽日可以輕鬆啲;但好多時大家根本就冇嘢做,除咗用多成個鐘坐暖張凳之外。

最後,David喺嗰間公司做咗大半年之後終於頂唔順,連bonus都唔等就走咗,佢嘅原因好簡單:

喺呢大半年裡面佢已經燃燒咗大約180個鐘。假設每套戲長2個鐘,佢總共浪費咗90個可歌可泣嘅故事,而佢亦唔想自己成為其中一個。

🤓【二O十九求職百科】大全

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion"以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!


圖片來源:《九品芝麻官》、《逃學威龍》、《西遊記大結局之仙履奇緣》

Wantedly, Inc. (Hong Kong)'s job postings

Weekly ranking

Show other rankings
If this story triggered your interest, go ahead and visit them to learn more