【WantedlyHK團隊特輯】⑤咩叫「Work-Life Balance」?大大個人辦畀你睇!

見到封面古銅色嘅肌膚,一睇就知Nikita Leung除咗係Wantedly嘅Marketing & Partnership之外,仲係一名運動健將。但做運動可以去到幾盡?就係喺英國讀完大學,有工都唔做而回流香港,為嘅好簡單──排球。

大家可能會覺得佢份人好亂嚟,浪費咗大好機會,但講到尾都係同好多年輕人一樣,最緊要「鍾意」呢兩個字:「讀psycho就好玩,但如果要我做psycho,我諗我take唔到咁多負能量。而且純粹論training的話,香港嘅排球發展比英國好得多,就好似我喺嗰邊打咗幾年都唔覺得自己有咩進步,但返到嚟打咗半年已經唔同咗好多。」

但打波還打波,相信大家都聽過前特首話:香港嘅體育界「冇任何經濟貢獻」,所以邊有咁多運動員可以全職投入呀……結果都要搵食㗎。

返工≈打波──最緊要都係條team!

畢業返到嚟,除咗打波之外Nikita當然都要搵工啦,marketing聽落又幾好玩,咁就入咗呢行:「嗰陣喺Cxxxn(下稱C公司)做contract-based嘅B2B marketing,一開始都覺得學到好多嘢,但做耐咗就發覺啲嘢好重覆,不斷搞event,公司文化又比較傳統,於是就想睇吓有冇有趣啲嘅工種。」

喺C公司嘅時候見到sales可以經常出field見客,為咗唔使再24小時都對住張spreadsheet,佢就入咗Hxxs(下稱H公司)做recruiter,講到呢度佢仲笑住話:「咁結果呢,原來做recruiter都係stay喺office嘅,而且公司文化同sales嘅本質好『chur』,加上作為一個sales係一件好孤獨嘅事,諗返做marketing嘅時候成條team一齊做嘢嘅感覺開心好多。」到最後,做咗兩個月佢就「頭也不回」了。

「雖然我好似講到喺大公司做嘢嘅感覺好差咁,但其實喺嗰段時間我學咗好多嘢。例如喺C公司學到做嘢嘅規矩同structure應該係點,work flow又點先係最好;喺H公司又會有好多senior教我唔同嘅sales/ soft skills,仲可以喺manager講電話嘅時候偷吓師添。」結果,Nikita就帶住所有學咗嘅嘢加入Wantedly。

大公司vs細公司──有辣有唔辣啦~

喺成間公司裡面,Nikita可以話係最「迂迴」嘅一個,咁即係咩意思?讀完心理學,做marketing、sales、又再做返marketing,可以話係「彈出又彈入」。但好多時候,其實你唔試過又點會知自己鍾意啲乜野。

大細公司都做過嘅Nikita就有咁嘅睇法:「因為我哋喺香港嘅規模仲係細,所以真係可以『work as a team』,做所有決定都可以好快,就算想搵top management都可以即刻搵到,同我以前返傳統公司嘅運作模式好唔同。」而且Wantedly都令到Nikita搵到個好舒適嘅平衡:「其實我中學已經有睇啲design嘢,女仔係鍾意靚嘢㗎啦,但係一路都冇乜機會去試。而家除咗可以做多咗design之餘,要準時收工去練波都完全冇問題。」

如果要筆者用排球去比喻兩者,喺細公司裡面,一傳、set波、殺波,成個進攻都好smooth;但傳統公司嘅話,個波可能連網都過唔到,事關實在有太多人專注攔網。

排球⇌工作──Why not both?

喺訪問期間,Nikita一直有意無意咁圍繞住排球,筆者好奇問排球於佢嘅「意義」係啲咩,佢就定義為「非常熱愛嘅興趣」,而且係一樣工作以外會令自己開心嘅嘢,所以佢唔會畀自己顧此失彼:「我一路都好努力去balance呢兩件事,我覺得而家呢個狀態好好,可以develop我嘅career之餘又可以繼續喺球場上打滾。」

所謂work-life balance喺Nikita嘅世界裡面,好似好容易就做得到,但大家又有冇努力去搵份適合自己balance嘅工作?而搵到嘅時候,你又會唔會有嗰份自律去balance呢?

後記:每個運動員都會有自己嘅職業生涯,至於Nikita幾時先會完結佢嘅「半職業」生涯?佢就咁講:「到有一日有啲更重要嘅事、需要放更多時間專注去做咪打少啲,不過如果你話幾時會放棄排球呢種運動,我諗都幾難。」
人生漫漫長路,每個決定都有取捨,而個選擇就一直都喺自己度。

未睇之前嘅訪問?🤨可以去樓下喎👇🏼

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion"以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Wantedly, Inc. (Hong Kong)'s job postings
1 Likes
1 Likes

Weekly ranking

Show other rankings